ភ្នំពេញ៖ អគ្គនាយកដ្ឋានពន្ធដារ ក្នុងរយៈពេល១១ខែ ឆ្នាំ២០២៣ ប្រមូលចំណូលពន្ធអាករសម្រេចបាន ៣ ៣៤៧,១៨លានដុល្លារ ស្មើនឹង ៩៣,៧១ភាគរយ នៃផែនការប្រចាំឆ្នាំ២០២៣។ នេះបើតាមសេចក្តីប្រកាសព័ត៌មាន ស្តីពីកិច្ចប្រជុំបូកសរុបលទ្ធផលការងារ និងទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារ ដែលធ្វើឡើងក្រោមអធិបតីភាព អគ្គនាយកនៃអគ្គនាយកដ្ឋានពន្ធដារ លោក គង់ វិបុល នាថ្ងៃទី១៩ ខែធ្នូ ឆ្នាំ២០២៣។

ទន្ទឹមនឹងនេះដែរ ក្នុង១១ខែមកនេះ អគ្គនាយកដ្ឋានពន្ធដារ ក៏បានដោះស្រាយឯកសារបណ្តឹងតវ៉ាលើសវនកម្មពន្ធដារសម្រេចបានចំនួន ៣៩៦ករណី និងដំណោះស្រាយចំពោះករណីស្នើសុំអត្ថប្រយោជន៍ពីការអនុវត្តកិច្ចព្រមព្រៀងស្តីពីការចៀសវាងការយកពន្ធត្រួតគ្នាដែលមានសរុបចំនួន ៤០៦សហគ្រាស។

ជាមួយគ្នានេះ អគ្គនាយកដ្ឋានពន្ធដារ បានផ្តល់សេវាពិគ្រោះយោបល់ជូនអ្នកជាប់ពន្ធ បានចំនួនជាង ១០ម៉ឺនករណី ក្នុងនោះតាមរយៈ Call center 1277 ចំនួនជាង ៦ម៉ឺនករណី៕